Kuri iki cyumweru 07 Kamena 2026 mu Murenge wa Kinihira, Akagari ka Bweramvura mu Karere ka Ruhango habereye igikorwa cyo kunamira no guha agaciro Abatutsi bishwe muri Jenoside bakajugunywa mu mugezi wa Nyabarongo. Iki gikorwa cyitabiriwe n'Ubuyobozi bw'Akarere ka Ruhango, Komiseri babiri ba IBUKA ku rwego rw'Igihugu, abagize Inama Njyanama y'Akarere, inzego z'umutekano, abayobozi mu nzego zitandukanye ndetse n'abaturage baturutse hirya no hino mu Gihugu baje kwifatanya mu gikorwa cyo kwibuka no guha icyubahiro abazize Jenoside.

Mu butumwa bwatanzwe, hibanzwe ku gukomeza gusigasira amateka nyayo ya Jenoside yakorewe Abatutsi, kurwanya ingengabitekerezo ya Jenoside n'ibindi bikorwa byose biyikomokaho, ndetse no gushishikariza urubyiruko kugira uruhare mu kubungabunga ukuri kw'amateka no guharanira ko Jenoside itazongera kubaho ukundi. Hanashimangiwe akamaro ko gukomeza gufasha abarokotse Jenoside no gukomeza kubaka Ubumwe  nk'inkingi y'iterambere rirambye ry'Igihugu.

Abitabiriye iki gikorwa bunamiye inzirakarengane zazize Jenoside yakorewe Abatutsi, banumva ubuhamya bwatanzwe n'uwarokotse Jenoside, bwagarutse ku mateka y'ubugome ndengakamere bwakorewe Abatutsi bajugunywe mu mugezi wa Nyabarongo. Ubu buhamya bwagaragaje ubukana bwa Jenoside n'ingaruka zayo, ariko bunatanga isomo ryo gukomeza guharanira ukuri, ubutabera no kubaka ejo hazaza harangwa n'amahoro n'ubumwe.

Igikorwa cyaranzwe no gufata umunota wo kwibuka no guha icyubahiro abazize Jenoside yakorewe Abatutsi, hakurikiraho gushyira indabo mu mugezi wa Nyabarongo nk'ikimenyetso cyo kuzirikana no kunamira inzirakarengane zahiciwe zikajugunywa muri uwo mugezi. Abitabiriye iki gikorwa bongeye gushimangira umuhigo wo gukomeza kubungabunga amateka, kurwanya ingengabitekerezo ya Jenoside no gusigasira ibyo Igihugu cyagezeho mu rugendo rwo kubaka ubumwe n’ubudaheranwa.