Ruhango: Gahunda yo gukumira ibinyobwa bitujuje ubuziranenge irakomeje

Akarere ka Ruhango gakomeje ibikorwa byo kurwanya no kurandura ibinyobwa bitujuje ubuziranenge, hagamijwe kurengera ubuzima bw’abaturage. Mu gikorwa cyakozwe kuva ku itariki ya 2 kugeza ku ya 13 Kanama 2026, kiyobowe n’Umuyobozi w’Akarere ka Ruhango, Bwana HABARUREMA Valens, ku bufatanye n’inzego z’umutekano n’amakipe yihariye ashinzwe ubugenzuzi, imibereho myiza n’umutekano, hagenzuwe ibikorwa by’ubucuruzi mu Mirenge yose y’Akarere.
Muri icyo gikorwa, mu Karere hose hamenwe ibinyobwa bitujuje ubuziranenge bingana na litiro 122,020.6, zari mu macupa n’ibindi bipfunyikamo bigera kuri 83,949. Muri izi litiro zose, 10,323.6 zari iz’ibinyobwa bikorwa mu buryo bunyuranyije n’amategeko, mu gihe 111,697 zari iz’ibindi binyobwa bitujuje ubuziranenge. Umubare munini w’ibyamenwe wagaragaye mu Mirenge irimo Ruhango, Bweramana, Byimana na Kinazi.

Umuyobozi w’Akarere ka Ruhango, HABARUREMA Valens, yashimangiye ko kurengera ubuzima bw’abaturage ari inshingano y'ibanze kandi ihuriweho n’inzego zose n’abaturage. Yagize ati: “Ntabwo dushobora kwihanganira ibinyobwa bitujuje ubuziranenge kuko ari intandaro y'ibibi byinshi nk'ubuhumyi, imibereho mibi, ndetse n’urupfu. Turasaba ababicuruzaga n’ababikoraga kutongera kubitekereza, abaturage bakirinda kongera kwifuza kubinywa, tukanabahamagarira gukomeza gutanga amakuru ku babikora cyangwa ababicuruza.”

Meya Habarurema yakomeje asaba abandi Bayobozi bakorana gukomeza igenzura kugeza nta binyobwa bibi bisigaye mu baturage.

Ku ruhande rw’abaturage, gahunda yo kumena ibinyobwa bitujuje ubuziranenge irashimwa kuko babona ko izafasha kurinda ubuzima no kugabanya ibibazo byaterwaga no kunywa ibinyobwa bibi. Kubakoraga n'abacuruzaga bene ibi binyobwa, nabo bemera ko byangizaga ubuzima n'umutekano by'abaturage, bamwe bati: "N'ubwo duhombye ariko ibi byemezo byari ngombwa, tuzunguka mu byiza". Ubuyobozi kandi burasaba abacuruzi n’abakora ibinyobwa kudahisha ibyo binyobwa kuko bitazongera kunyobwa na rimwe, ko inama nziza ari ukwihutira kubigeza ku Bayobozi, kuko abinangira barahanwa bitari ngombwa.