Kuva kuwa 24 kugeza kuwa 26 Kamena 2026, Akarere ka Ruhango katangije ku mugaragaro Ruhango District JADF Open Day 2026, igikorwa kigamije kugaragaza uruhare rw'Abafatanyabikorwa mu iterambere ry'Akarere no kwegera abaturage babagezaho serivisi n'ibikorwa bibafasha kuzamura imibereho yabo.

Iki gikorwa cyafunguwe n'Ubuyobozi bw'Akarere ka Ruhango, cyitabirwa n'abagize Inama y'Umutekano Itaguye, Abafatanyabikorwa b'Akarere, abayobozi batandukanye ndetse n'abaturage.

Mu butumwa bwatanzwe, hagarutswe ku ruhare rukomeye Abafatanyabikorwa bagira mu gushyigikira gahunda z'iterambere ry'Akarere, hibandwa ku gukomeza gukorera hamwe hagamijwe gushyira umuturage ku isonga no kumufasha kwikura mu bukene.

Abafatanyabikorwa basabwe kurushaho guhuza ibikorwa byabo no kunoza ubufatanye, harimo gushyiraho ububiko bw'amakuru (database) bw'abaturage bamaze kunganirwa kugira ngo haboneke ishusho nyayo y'abo ibikorwa byagezeho. Ibi bizafasha gukumira ko abafatanyabikorwa batandukanye bafasha umuntu umwe inshuro nyinshi, mu gihe hari abandi bataragerwaho n'inkunga cyangwa serivisi.

Hanagarutswe kandi ku kamaro ko gukora ubushakashatsi bushingiye ku makuru afatika, buzafasha Akarere kongera umusaruro w'ubuhinzi n'ubworozi, hagendewe ku kuba Ruhango ari Akarere gafite ubushobozi n'ubutaka bukwiriye ibikorwa by'ubuhinzi n'ubworozi. Ibi bizafasha mu kugena neza gahunda z'iterambere no kongera umusaruro ugamije kuzamura imibereho y'abaturage.

Imurikabikorwa rizamara iminsi itatu, rikaba ari umwanya mwiza wo gusangira ubunararibonye, kugaragaza ibikorwa n'udushya by'Abafatanyabikorwa, ndetse no kurushaho gushimangira ubufatanye bugamije iterambere rirambye ry'Akarere ka Ruhango, hashyirwa umuturage ku isonga.