Mu Karere ka Ruhango, ku Rwibutso rwa Jenoside rwa Kinazi, habereye igikorwa cyo Kwibuka ku nshuro ya 32 imiryango 1,136 yazize Jenoside yakorewe Abatutsi mu 1994 ikazima. Uyu muhango waranzwe no kunamira inzirakarengane zazize Jenoside, hatangwa ubuhamya bw'uwarokotse Jenoside, humvikana indirimbo zo Kwibuka, hafatwa umunota wo kwibuka ndetse hashyirwa indabo ku rwibutso mu rwego rwo guha icyubahiro abazize Jenoside.

Mu butumwa yagejeje ku bitabiriye uyu muhango, Umuyobozi w'Akarere ka Ruhango yasabye urubyiruko gukomeza kwigira ku mateka nyayo y'Igihugu, rukarangwa n'indangagaciro z'ubumwe, ubudaheranwa n'urukundo rw'Igihugu. Yashimangiye ko urubyiruko ari rwo musingi w'ejo hazaza h'u Rwanda, bityo rukwiye kurwanya ingengabitekerezo ya Jenoside n'ubundi buryo bwose bw'amacakubiri, rukaba umusemburo wo kubaka Igihugu kirangwa n'amahoro n'ubumwe.

Yanibukije urubyiruko ko kubungabunga amateka no guharanira ko Jenoside itazongera kubaho ari inshingano za buri Munyarwanda. Yarusabye gukoresha amahirwe rufite mu burezi no mu ikoranabuhanga mu guteza imbere Igihugu, rugaharanira kuba intangarugero mu bikorwa byubaka umuryango nyarwanda no kwimakaza indangagaciro z'ubumuntu.

Igikorwa cyasojwe no gushyira indabo ku rwibutso rw'Akarere rwa Kinazi, abitabiriye bongera kwiyemeza gukomeza kuzirikana amateka, gufasha abarokotse Jenoside no kubaka u Rwanda ruzira urwango n'amacakubiri, rushingiye ku bumwe, ubwiyunge n'iterambere rirambye.