kuri uyu wa 4 Nyakanga 2026, Akarere ka Ruhango kifatanyije n'Abanyarwanda kwizihiza ku nshuro ya 32 Umunsi wo Kwibohora, mu birori byabereye mu Murenge wa Ruhango byitabiriwe n'Ubuyobozi bw'Akarere, inzego z'umutekano, abaturage ndetse n'abashyitsi batandukanye. Uyu munsi waranzwe no kuzirikana urugendo rw'Igihugu mu kubohora Abanyarwanda no kongera gushimangira uruhare rwa buri wese mu kubungabunga ibyagezweho no gukomeza kubaka iterambere rirambye.

Mu rwego rwo kwizihiza uyu munsi, hatashywe ibikorwa remezo bitandukanye byitezweho guteza imbere imibereho y'abaturage n'ubukungu bw'Akarere. Birimo ikibuga kizajya gikoreshwa mu bizamini by'ibinyabiziga mu Murenge wa Ruhango, ikiraro cya Ntosho gihuza Imirenge ya Bweramana (Ruhango) na Mukingo (Nyanza), ikiraro cya Cyihene gihuza Utugari twa Gitisi na Rwinyana mu Murenge wa Bweramana, umuhanda wa kaburimbo wa Kibingo–Buhoro ufite uburebure bwa kilometero 4.5, ndetse n'inyubako nshya ya Gare ya Ruhango izafasha abaturage kubona serivisi zitandukanye ahantu hamwe kandi mu buryo bworoshye.

Ibirori byanasusurukijwe n'amarushanwa yo gusiganwa ku maguru no ku magare ku bagabo n'abagore, aho abitwaye neza bahembwe mu byiciro byabo. Hanabaye igikorwa cyo gufasha abaturage batishoboye, aho imiryango ibiri yagabiwe inka ebyiri mu rwego rwo kuyifasha kuzamura imibereho no kwihaza mu bukungu bw'imiryango.

Mu butumwa bwatanzwe n'abayobozi batandukanye, hibukijwe ko Kwibohora atari amateka gusa, ahubwo ari urugendo rwo gukomeza kubaka Igihugu gishingiye ku bumwe, ubudaheranwa n'iterambere rirambye. Ibirori byasojwe n'ubusabane bwahuje abayobozi, abaturage n'abashyitsi, bishimangira umuco wo gusangira ibyiza igihugu kimaze kugeraho no gukomeza gufatanya mu rugendo rw'iterambere.